Matud pa ni Kapitan Juanita Mabala nga napasalamat siya kang Mayor Socrates Fernandez ug sa hepe sa kapolisan sa siyudad kay nahinumdoman nila ang Tangke.
Miingon si Mabala nga sukad papahawaa ang mga polis nga gidestino diha sa Tangke niadtong miaging tuig, ingon og sa nanagpiyesta ang mga negosyanteg ilegal nga drugas.
Sa pagkakaron may usa na ka semana ang maong mga polis nga naa mag-opisina sa barangay hall sa Tangke, ug namatikdan ni Mabala nga maorag nagkingking ang mga pusher.
Ang mga mamalit usab nga gikan sa nagkalainlaing lugar, maglisod na pagsulod diha sa Tangke kay giatangan na kini sa mga polis ilabi na sa panahon sa kagabhion.
Mikibra ang mga mamalitay og shabu nga gikan sa ubang lugar lahi kaniadto nga morag magpiyesta ang Tangke matag gabii tungod sa kadaghang tawo nga mosulod ug mogula sa maong lugar.
Matud pa ni Mabala nga dugay siyang nag-antos sa suliran nga way polis ang iyang barangay, apan karon nga naa na, iyang gihangyo ang mayor nga ipermanente lang ang maong mga otoridad.
Apan miingon si Mabala nga puwerting malditoha sa mga pusher sa Tangke kay palipaton lang ang mga otoridad.
Matud pa niya nga sa higayong malipat ang polis, mahuygo-tudo usab og pamaligya og shabu ang mga pusher.
Nasuta niya kini, matud pa ni Mabala dihang gipatawag ang maong mga pusher alang sa usa ka "anti-drug covenant" didto sa City Hall sa Talisay diin bisan usa sa napulo nga gipatawag, wa gyuy bisan usa nga misanong ug mitunga sa maong panagtagbo.