Ang suspetsado mao si Kevin Saladaga nga gibanabanang 20-anyos ang panuigon, ulitawo nga usa ka notadong rugby boy sa maong dapit.
Gikuyogan sa bana ang biktima sa pagdangop sa Police Station sa Mandaue City Police Office (MCPO) alas 4 pasado ang takna sa kaadlawon sa miaging Sabado.
Sa pagpakighinabi sa Banat News kang PO1 Stephane Amamag-id desk officer sa nahisgotang presinto nasayran nga namasahero sa traysikad ang bana sa biktima dihang gisaka sa suspetsado ang ilang panimalay alas 12 pasado ang takna sa tungang gabii.
Sumala pa sa biktima nga gisukmag sa suspetsado ang iyang tiyan dihang mikisikisi unta siya aron sa paglingkawas sa dautang tinguha niini ngadto kaniya.
Dugang pa sa biktima nga nagsinggit-singgit pa sa kalipay ang suspetsado sa dayon niining paggawas sa ilang panimalay human usab sa paglugos kaniya.
Matud pa ni PO1 Amamag-id nga dali nilang gisusi ang maong insidente apan nakasibat na ang suspetsado sa ilang paghidangat sa maong dapit.
Si PO1 Amamag-id miingon nga ilang gipaabot ang medical certificate sa biktima sa pagpalig-on sa kasong pagpanglugos nga ilang isang-at sa korte batok sa suspetsado.