Video karera mikuyanap sa 27 barangay sa Mandaue

Mga video karera machine nga padayong mikuyanap sa hilit nga mga lugar sa 27 ka barangay sa dakbayan sa Mandaue padayon gayod nga pagasakmiton sa kapolisan.

Kini ang pagahimuon sa kapolisan human usab nila masayri ang nagpadayong pagkuyanap dihang nasakmit nila ang mokabat sa 20 kapin ka video karera machine.

Si PO3 Allan Alinsunod ug mga kauban sa vice squad section sa Mandaue City Police Office (MCPO) sa managkalahing takna ug dapit niini ang nakasakmit og mokabat na sa 20 kapin ka mga functional nga karera.

Ang maong mga functional nga karera nasakmit sa nagkalainlaing dapit sa dakbayan nga naglakip sa Opao, Pagsabungan, Mantuyong, Labogon, Guizo, Casuntingan, Banilad, ug Tipolo sa maong dakbayan.

Dugang nasakmit nga mga karera sa barangay Ibabao, Paknaan, Umapad, Jagobiao, Looc, Subangdaku, Manguikay, Cabancalan, Tabok, Centro, Alang-Alang ug Cambaro.

Si Superintendent Paquito Belandres, officer-in-charge sa Mandaue City Police (MCPO) mihingusog karon sa ilang pagpangsakimt niini.

Sa dugang nasayran sa team sa vice squad section sa kapolisan sa MCPO nga sagad sa mga nasakmit mao ang karera nga may tatak nga nag-ila sa nanag-iya nga TM, Dragon ug ang pipila may Chinese character.