Nanagpa'g inahan nalubaan patay

Patay ang usa ka lalaki human kini gidunggab sa iyang bayaw tungod sa pagsagpa sa biktima sa inahan sa suspek atol sa panag-inom sa dalan V. Rama, Sambag I, kagahapon sa kaadlawon.

Si PO3 Glen Cuyos sa Homicide Section miila sa biktima nga si Leonardo Cuizon, 40. Ang nagdunggab ni Cuizon nga si Julieto Parilla, 32, taga Calamba, ning dakbayan nadakpan ug gibalhog sa Punta Princesa Police Station.

Sumala pa ni Cuyos nga naabot ang inahan ni Parilla sa giinoman niini, uban ni Cuizon ug mga higala ug kalit lang nangasaba sa grupo nganong gipainom iyang anak.

Nasinta si Cuizon hinungdan nga gisagpa niini ang inahan ni Parilla. Si Parilla nga nasuko mibunot og mahait nga hinagiban ug midunggab makadaghang higayon ni Cuizon kinsa wala na makaabot pang buhi sa Cebu City Medical Center.