Lalaki gikulata, gihulog sa pangpang

Usa ka lalaki nga gihulog sa pangpang sa Transcentral Highway, habig na sa barangay Balamban, Sugb, napalgan niadtong Sabado sa hapon.

Giila ang maong lalaki nga usa ka Boy Patases, walay tino nga pinuy-anan ug giingong nalisoan sa maayong pangisip.

Si PO3 Hanibal Larida miasoy sa Banat News nga ulahing nakit-an si Patases niadtong Biyernes sa Magsaysay, Balamban nga nanabo unahan sa bukiran sa Manunggal.

Ang lawas ni Patases nga adunay daghang mga bun-og nakit-an na lang ubos sa pangpang nga may giladmon nga 30 metros.

Gawas sa mga bun-og, adunay nakit-ang samad sa liog si Patases nga maoy gituohang hinungdan sa hinanali niining kamatayon.

Nagtuo si Larida nga gibunalan og magahing butang si Patases.

Sa laing bahin, duha ka lalaki ang nalandig sa tambalanan human gipamusil sa wala mailhing tawo sa Singsing, usa ka bukirang barangay sa Balamban.

Si Glowee Canbralo, 20, nakaangkon og duha ka samad pinusilan sa iyang tiyan ug usa sa liog agi sa .38 kalibre nga bala.

Sumala pa sa kapolisan nga si Canbralo gikan sa diskohan niadtong Sabado sa gabii uban sa laing upat ka mga higala aron mang-disko nunot sa umaabot nga kapistahan sa maong dapit.

Matud pa nga giatngan si Canbralo sa dalan nga awaaw sa laing tulo ka lalaki ug usa niini ang mipusil kaniya.

Ang ikaduhang biktima sa pamusil mao si Fariolito Suico Mesa, 21, kinsa gipusil ala una sa kaadlawon kagahapon.

Naglingkod lang si Suico kilid sa diskohan sa dihang gidul-itan og .357 nga rebolber sa wala mailhing tawo.

Matud ni Larida nga wala makabuto kaduha ka higayon ang armas, apan mibuto sa ikatulong kablit hinungdan sa pagkababha sa iyang tangkugo.

Sila si Canbralo ug Suico gidala sa Vicente Sotto Memorial Medical Center.