2 ka gasolinahan giigo sa tulisan de motor

Tulisang magmotorsiklo nakaigo na usab niadtong Sabado diin duha ka gasolinahan ang ilang nabiktima gikan sa lungsod sa Cordova ug dakbayan sa Sugbo sa managlahing oras.

Unang gitulis mao ang gasolinahan sa Pilipog, Cordova niadtong Sabado sa hapon, ang Caltex gasoline station nga gipanag-iya sa usa ka Ephraim Dinoy gitulis sa duha ka wala mailhing mga lalaking luwan sa usa ka motorsiklong kolor blue.

Matud pa sa kapolisan nagpakaaron-ingnong kustomer ang mga suspek dihang miduol sa kahera kalit nila kining gitiunan ug gikuha ang halin nga P5 mil dayong nangikyas.

Samtang pagka-alas 6 sa hapon sa samang adlaw, ang Petron gasoline station nga gipanag-iya ni Susana Co sa dalan Archbishop Reyes sa barangay Luz, siyudad sa Sugbo mao nasay nabiktima.

Si PO3 Arnold Abentajado sa pakighinabi sa Banat News nagkanayon nga duha ka wala mailhing lalaki ang mition og armas sa kaherong si Perfecto Harina, 27.

Gibanabanang nagpangidaron pa og 20 anyos ang mga suspek nga armado ug wala matinong kalibre sa armas apan ang motorsiklo walay plate number.

Ang kaherong si Harina gisukitsukit nila ni P02 Jonard Velez mitug-an nga nagpahiyom pa nga miduol kaniya ang suspetsado.

Nahingangha na lamang siya dihang kalit lang ang usa sa mga suspetsado mition kaniya og armas dungan ang pagdeklarar og tulis ug gikuha ang halin nga P4 ,800.

Dali usab nga nangikyas ang mga suspek human sa pagpanulis.