Kanhi heneral sa kapolisan gipatawag ni Tomas gahapon

Nakadawat og daghang mga reklamo si mayor Tomas Osmeña gikan sa mga molupyo sa bukirang mga barangay dinhi sa dakbayan sa Sugbo may labot sa gikatahong pagpang-harass ngadto kanila sa retiradong heneral sa kapolisan nga si Tiburcio Fusillero.

May labot kini sa mga gipahigayong re-forestation program ni Fusillero ngadto sa mga bukirang barangay sama diha sa Cantipla, Tabunan, Sudlon ug uban pa nga gireklamo sa mga molupyo sa maong lugar.

Kini tungdo kay matud nila gilupigan sila sa kanhi opisyal nga miilog sa ilang mga katungod sa mga luna nga ilaha kaniadtong gitikad nga karon gigamit alang sa reforestation ni Fusillero.

Kini maoy hinungdan nga gipatawag ni Osmeña si Fusillero kagahapon didto sa iyang buhatan sa City Hall ug gihisgotan ang maong problema.

Mapasalamaton hinuon si Osmeña nga nikooperar si Fusillero sa iyang gihimo ug gitahasan niya karon si Labangon barangay captain Felix Abella nga maoy mo-atiman sa maong problema.

Gipili og kuha ni Osmeña si kapitan Abella gumikan kay kanhi kini direktor sa Bureau of Lands ug nasuhito kabahin sa suliran sa yuta.

Giklaro ni Osmeña nga wala niya obligaha si Fusillero nga patubagon sa mga reklamo nga iyang nadawat dihang iyaha kining gipatawag kagahapong adlawa gumikan kay igo lang nilang gihisgotan ang maong problema aron kapangitaan og paagi nga masulbad.