Tomas dili mamugos sa di modawat

Wala mohatag og konsiderasyon si mayor Tomas Osmeña ngadto kang Dalaguete mayor Ronald Allan Cesante nga iyang nahukman nga dili hatagan og P100 mil nga hinabang pinansiyal gikan sa dakbayan sa Sugbo ngadto sa mga kalungsoran sa lalawigan.

Kini bisan sa gipadalang suwat pagpasabot ni mayor Cesante ngadto kang Osmeña may labot sa giluwatan niyang pamahayag sa maong isyu nga maoy hinungdan sa kasuko ni Osmeña.

Si Cesante kinsa maoy presidente sa Cebu Municipal Mayors League unang mipadayag nga wala na kinahanglana ang P100,000 aron magamit pagdani sa mga taga probinsya nga mamauli atol sa upat ka adlaw nga holiday gumikan sa ASEAN Summit karong Disyembre.

Nagkanayon si Osmeña nga kadto lang mga mayor sa lungsod nga nagkinahanglan og ayuda ang makapahimulos sa iyang gitanyag ug dili siya mamugos sa wala magkinahanglan niini.

Ang maong gahin gitagana sa mayor aron magamit sa mga lungsod pagpahigayon og kalihukan atol sa mga holidays aron maaghat ang nanarbaho sa Metro Cebu pagpauli.