Pakisusi sa EMB sa reklamasyon sa Borbon, Cebu gipursige sa mayor

Gipursige sa mayor sa lungsod sa Borbon ang Environmental Management Bureau (EMB) sa Department of Environment and Natural Resources (DENR) sa pagpahibalo sa mga opisyal sa naasoy'ng lungsod sa resulta sa imbestigasyon kalabot sa proyekto sa inilang negosyante.

Si Mayor Neal Vergara misulat kang EMB-7 regional director Alan Arranquez ug gipangayo niini ang resulta sa imbestigasyon sa reclamation project nga gipatuman ni Michel Lhuillier sa barangay Bingay, Borbon, Cebu.

Sumala pa ni Vergara nga walay permiso sa Philippine Reclamation Authority (PEA), walay naaprobahang foreshore lease, ug walay environmental compliance certificate (ECC) ang maong proyekto.

Ang sulat ni Vergara gipadala usab ngadto kang Gobernador Gwendolyn Garcia, Kongresista Red Durano, Bokal Victor Maambong, ug Agnes Magpale.

Sa sayo pa, si Arranquez, sa iyang sulat ngadto ni Vergara pinetsahan og Pebrero 7, 2006, kini misaad sa mayor nga mohimo og on-site inspection mahitungod sa maong proyekto.

Sa laing bahin, usa ka forester sa DENR-CENRO nga si Danilo Lendio nga nadestino sa Camotes Island Mangrove Swamp Forest Reserve gi-recall ni Provincial Environment and Natural Resources OIC Richard Abella tungod sa matud pa pagpabaya niini sa trabaho pagbantay sa mga bakhawan sa naasoy'ng isla.

Sumala pa sa recall order ni Abella, napakyas si Lendio pagbadlong sa pagpangubkob og yuta ug pagpabarug og beach resort sa maong negosyante sa isla sa Camotes.

Si Lendio nga gimanduan nga adto pa-reporton sa CENRO-Carmen gihulipan ni Dennis Pascual isip caretaker sa mangrove swamp forest reserve sa isla sa Camotes.

Sa sayo pa, ang mga mananagat sa Barangay Bingay ug Campusong sa Borbon nangreklamo tungod sa proyekto ni Lhuillier nga matud pa gitukod duol mismo sa baybayon hinungdan nga maglisud na sila sa pag-agi paingong managat.

Gipangayo sa mga mananagat sa duha ka barangay nga dili sila mapalayo gikan sa baybayon diin sila magsalig sa ilang kapanginabuhian.

Sa pamahayag nga gipadala sa Banat News sa Magay Fishermen's Association sa Barangay Bingay, Borbon, awhagon nila silang Kongresista Durano, Etta Rosales, ug Satur Ocampo sa pagpahigayon og pakisusi sa ilang kahimtang.