Dugang traffic lights gipangayo sa TEDMAN kang Ouano

Dugang traffic lights sa kadalanan sa dakbayan sa Mandaue maoy gipangayo aron kamenusan kundili man kalikayan ang mga aksidente sa kadalanan sa nahisgutang dakbayan nga ning bulan sa Marso dunay pito ka tawo ang natalang napatay tungod sa aksidente.

Kini ang gipahibalo sa executive director sa Traffic Effeciency Development and Management (TEDMAN) nga si Damian Enrico Ouano sa gipadala niining sulat ngadto kang Mayor Thadeo Ouano .

Ang mga eskina sa kadalanan sa dakbayan nga nagkinahanglan og traffic lights mao ang A. Soriano Avenue ug eskina SB Cabahug Extention sa Tribunal, Centro, CD Seno St ug Eskina A.C. Cortes Ave sa Ibabao, P. Burgos St. ug eskina A.C. Cortes Avenue sa ML Quezon Ave., E.O. Perez St. ug Ouano Avenue sa barangay Alang-Alang ug uban pa.

Sa gihimong pagpakighinabi sa Banat News kang Mayor Ouano iyang gipasabot nga ang pagdugang og traffic lights ug suga sa kadalanan sa dakbayan maoy nalakip sa pagpangandam sa Asean Summit.

Gipasabot niya nga iyang gitinguha nga labing hayag ang tibuok dakbayan sa panahon sa gabii atol unya sa maong kalihokan karong Disyembre niining tuiga.