Ang gipasaakan og kaso mao sila si PO2 Jackson Rivera, PO2 Darios Conejos ug ang asset nga si Henry Señara.
Samtang si Carl Racid Villacin nga gitumbok nga maoy mipusil patay ni Desamparado mag-atubang og kasong murder ug kalapasan sa Akta Republika 9165.
Matud pa ni Lapu-Lapu City Police Chief Supt. Louie Oppus wala makapresentar ang duha ka polis og basehan sa legalidad sa pagpahigayon nila og buybust operation sa dakbayan sa Lapu-Lapu. Gikonpiskar ni Oppus ang mga armas sa duha ka polis ug bisan pa nga nagpakita kini og mga dukomento, gipasaka gihapon niya ang kasong ilegal nga paghupot ug bahala na ang duha ka polis sa pagprobar ngadto sa korte sa legal nilang pagdala og armas.
Samtang si Villacin gipasakaan na kagahapon og kasong murder ug kalapasan sa pagpayuhot og ilegal nga drugas sa Lapu-Lapu City Prosecutor's Office.
Subay niini, usa sa gidudahan ni Oppus nga motibo sa wala pagpananghid sa tulo ka mga polis sa dakbayan sa Mandaue mao ang pagguba sa ilang reputasyon sa kapolisan sa Lapu-Lapu may kalambigitan sa pagsumpo sa ilegal nga drugas sa dakbayan sa Lapu-Lapu.
Apan bisan pa sa maong panghitabo wala gihapon matandog si Oppus ug matud pa niini nga padayon gihapon ang kampanya batok sa ilegal nga drugas sa dakbayan sa Lapu-Lapu, pinaagi sa sunodsunod nga operasyon.
Nagpasalamat usab si Oppus sa katawhan sa Lapu-Lapu sa ilang pagsalig sa kapolisan gumikan kay ang mga pagpangronda sa mga ilegal nga kalihukan sa maong dakbayan dako ang natabang sa mga residente paghatag og impormasyon ngadto sa kapolisan sa dakbayan sa Lapu-Lapu.