Mikabat sa P520 mil ang danyos sa nahitabong sunog kagahapon sa hapon diha sa Barangay San Isidro Talisay diin upat ka balay ang naugdaw ug duha ang partially damage apan walay gikatahong naangol sa maong insidente.
Si Felipe Canillas, fire marshal sa Talisay mibutyag kagahapon sa Banat News nga ang mga balay nga naugdaw gama sa gaay nga materyales ug natukod kini niadtong tuig 1940 hinungdan nga dali kaayo kini gikaon sa kalayo.
Ang kalayo nagsugod sa kisame sa balay ni Concepcion Añasco ug gituohang electrical short circuit ang hinungdan ug naugdaw gyud ang maong balay.
Laing tulo ka balay nga naugdaw nga gipanag-iya ni Antonio Villavelez, Roger Caballero Leonardo Cagampang.
Ang partially burned mao ang Muy Bien bakery ug ang balay ni Marilou Restauro.
Matud ni Canillas nadawat nila mga alas 2:20 ang alarma sa sunog ug gipaubos kini sa ika-duhang alarma ug mga 10 minutos gikan sa ilang pagresponde napalong na ang kalayo.
Ang Pardo , San Nicolas ug Minglanilla fire station miresponde usab sa nahisgutang sunog.
Si Canillas mibutyag nga ang maong insidente maoy unang hitabo sa dakbayan sa pagsaulog sa fire prevention month niining buwana.
Giawhag ni Canillas ang mga Talisaynon ilabi na kadtong mga tag-iya og mga karaan nga balay nga ipatan-aw ang mga wiring sa ilang kuryente sa balay sa mga lisensiyadong electrician para malikayan ang insidente sa sunog tungod kay kasagaran sa hinungdan sa sunog electrical short circuit.