Kini maoy gipahayag sa presidente atubangan sa gibanabanang 150 ngadto sa 200 ka delegado gikan sa 15 ka mga nasud atol sa Cebu Dialogue on Regional Interfaith Cooperation for Peace, Development and Human Dignity diha sa Shangri-La Mactan Island Resort ning lalawigan.
Matud pa sa presidente dili angayang magpailad ang katawhan sa mga teroristang magtakuban sa relihiyosong pundok . Angayang magbantay usab ang mga tawo sa mga sayop nga idolohiyang ipanudlo sa mga relihiyosong pundok ngadto sa ilang mga sumusunod nga maoy magtukmod kanila sa pag-alsa batok sa ilang mga gobiyerno.
Si Arroyo kinsa usa ka relihiyosang sakop sa Simbahang Katoliko makadaghan nga gihasi sa iyang mga kritiko ug gipasanginlang nanikas niadtong 2004 election. Ang maong mga pasangil nagbunga og pagkabahin-bahin sa mga Pilipino.
Ang Catholic Bishop's Conference of the Philippines maoy usa sa mga nakapabugnaw sa sitwasyon sa milabay'ng tuig human wala sila manawagan sa pagpakanaog sa pangulo ug mitambag hinuon sa naulahi sa pagpangita og paagi ug legal nga solusyon aron matubag ang mga pasangil ug mahunong na ang kaguliyang sa Pilipinas.
Sa kasaysayan sa Pilipinas ang simbahan ug militar dako og natampo sa mga panghitabo sa gobyerno sukad niadtong Edsa uno ug Edsa dos. Wala niining duha ka dagkong pundok walay makab-ot nga kalampusan ang bisan unsang tinguha palagputon ang namuno.
Ang maong tigum kagahapon molanat og tulo ka adlaw diin tukion ang papel sa relihiyon sa kasamtangang sitwasyon sa kalinaw, seguridad, panglawas ug panggobiyerno sa tagsa-tagsa ka mga nasud.
Si Arroyo sa iyang bahin namahayag nga ang kalinaw sa Mindanao nunot niining gubat sa separitistang Moro Islamic Liberation Front makab-ot nalang sa mga kamot gumikan niining "interfaith dialogue."
Samtang pinaagi usab sa "interfaith dialogue" matud pa ni Arroyo nagkagamay ang kaniadto layo kaayong mga utlanan sa mga silingang nasud nga lahi og mga relihiyon ug tinuohan.
Gipanglantawang pinaagi niini nakabaton og respeto, pagsinabtanay ug kooperasyon ang mga nasud nga Muslim ug dili Muslim alang sa pagkab-ot sa ilang mga tagsa-tagsa ka malinawong tinguha sa kalambuan.
Lakip sa nitambong mao ang Primero Ministro sa New Zealand nga si Helen Clark ug ubang mga representante sa mga nasud gikan sa Indonesia, Fiji ug Australia.
Ang Southeast Asia ug Asia Pacific nga maoy sagad gigikanan sa mga delagadong nanambong maoy usa sa giisip nga labing duol sa hulga sa teroristang Jemaah Islamiyah nga karon gisuspetsahan nang nagtago ug nagbansay-bansay sa Mindanao.
Ang JI maoy gipasanginlang responsable sa mga pagpamomba sa Bali, Indonesia diin dunay kapin 200 ka mga tawo ang namatay ug gatusan usab ang naangol, sagad sa namatay mga Australyanong turista.