Gikan nakigbunyag giluyo'g pusil

Patay ang usa ka 45-anyos nga lalaki kinsa gikang mitambong og bunyag human kini pusila sa wala mailhing tawo niadtong Dominggo sa hapon diha sa atubangan sa Executive Homes Lawaan I Talisay.

Si Joselito Manano, taga Sityo Tanke Barangay Mambaling niining dakbayan kinsa nakaangkon og samad pinusilan sa likod nga bahin sa iyang ulo daling gidala sa iyang igsoon nga si Jaime sa Talisay district Hospital apan gideklara kini sa doktor nga patay na nga naabot sa tambalanan.

Ang suspetsado duha ka wala mailhing lalaki kinsa daling miikyas human sa hitabo.

Base sa imbestigasyon sa kapolisan sa Talisay pinangulohan ni SPO3 Danilo Jimeno nga si Manano uban sa iyang igsoon nga si Jaime gikan nga mitambong sa bunyag sa anak sa ilang pag-umangkon diha sa nahisgutang lugar.

Ang duha ka suspetsado kalit nga miduol sa managsoon samtang nag-atang kini og sakyanan paingon na nga mopauli.

Usa sa maong mga suspetsado miduol ni Manano ug sa walay pangutana gipusil ang biktima.

Ang kapolisan sa Talisay nag-follow up sa maong insidente.