Trapo-making sa Talisay

Gipahigayon na sa milabay'ng semana ang pagpanghimo og daghang trapo diha sa mga barangay sa Talisay.

Ang maong kalihukan ubos sa livelihood program ni Mayor Socrates Fernandez para sa mga kabus nga Talisaynon.

Gibutyag kagahapon ni Ike Durano, executive assistant ni Fernandez sa livelihood nga sa milabay'ng semana nakapamaligya na og mga finished product nga trapo ang mga miyembro.

Gitataw ni Durano nga gikan sa kagamhanan sa siyudad ang mga ekipo sa pagpanahi nga gigamit sa mga miyembro.

Si Durano nagkanayon nga ang siyudad usab maoy mipuhonan sa mga materyales alang sa produksyon ug ipautang kini sa mga miyembro.

Ang nahisgutang mass production gilusad diha sa Lagtang, San Roque, Lawaan I ug II.

Gibutyag usab ni Durano nga ang mga babayeng piniriso sa city jail sa Maghaway gilakip usab nila sa maong kalihokan.

Sa laing bahin, ang mga miyembro sa nagkalain-laing sektor dinhi sa Sugbo misaulog sa ilang anibersaryo diha sa Canton Beach Resort sa Talisay.

Si Criminal Intelligence Investigation Branch Chief Paul Labra ug Thelma Chiong sa Women Crusade Against Violence ug Durano maoy mga founder sa nahisgutang grupo.

Ang mga grupo gikan sa Lapu-Lapu, Mandaue ug Cebu City ang mitambong sa maong kasaulogan.