Koreyano nakadasmag og tulo nangaangol

Tulo ka tawo ang naangol human ang sakyanan sa Korean national aksidenteng mibangga sa traysikol nga ilang gisakyan niadtong Martes sa gabii diha sa Sityo Abuno, Barangay Pajak, Lapu-Lapu.

Maayong pagkatuwad sa traysikol dihang nabanggaan kini sa kotse sa Korean national.

Si Arnolfo Gulbin, 31-anyos, drayber sa traysikol nga nagtangag sa plakang GN- 5124, Juvy Hiyas, 21, taga Sityo Abuno, Pajak ug Penelope Alconcil, 33, residente usab sa maong lugar mga pasahero sa maong traysikol pulos nakaangkon og mga bun-og sa lawas.

Ang Emergency Rescue Unit Foundation (ERUF) ang midala sa tulo sa Mactan Doctors Hospital.

Si Ann Joo Young, 27-anyos, Korean national, temporaryong nagpuyo diha sa Sityo Mahayahay Barangay Bangkal Lapu-Lapu maoy drayber sa Kia Sedan pride nga nagtangag sa plakang GRB-735 nadetiner diha sa Lapu-Lapu police detention cell.

Gibutyag kagahapon sa Banat News ni PO3 Jose Noel Nalzaro sa Lapu-Lapu nga ang duha ka sakyanan nagbiyahe sa managlahing direksiyon.

Ang traysikol gikan sa Lapu-Lapu proper paingon sa Maribago ug ang kotse gikan sa Maribago paingon sa Lapu-Lapu proper.

Ang koste ni Young mikawat og lugar hinungdan nga nabanggaan niini ang traysikol ni Gulbin.