Municipal hall sa Lacion ibalhin

Ang pagbalhin sa municipal hall sa lungsod sa Consolacion maoy usa sa mga nag-unang gitinguha ni Mayor Avelino Gungob nga ikapatuman sa iyang administrasyon.

Si Gungob nga gikahinabi sa Banat News miingon nga nag-una sa iyang mga tinguha ang paghatag og kasayon sa mga lumolupyo sa lungsod nga kahatagan og pag-atiman ang ilang mga panginahanglan.

Dugang pa niya nga hagip-ot kaayo ang kasamtangan karong kahimtang sa munisipyo tungod kay anaa kini sa gamay kaayong luna.

Kini ang nakaaghat kaniya sa pagpahiluna sa munisipyo nga adto sa hamugaway nga luna ug sayon usab ang pag-alagad sa mga lumolupyo nga dili na usab maglisod sa pagpaingon sa ilang buhatan.

Matud pa ni Gungob nga daghan kaayong mga proyekto nga iyang gipaninguhang kahatagan og pagtagad nga naglangkob sa panglawas sa mga kabus, edukasyon sa kabataan ug uban pa.

Sumala pa niya nga ang pagpasakop sa Philhealth sa mga kabus ug ang paghatag og mga ID card nga gikan kang Gobernador Gwendolyn Garcia dako kaayong tampo alang sa mga lumolupyo sa maong dapit.