Gipahibalo ni Nagiel Bañacia city information officer nga tumong niini aron mahibaw-an kun kompleto na ang pagpangandam nga gihimo sa dakbayan ug matubag dayon ang mga ginagmay pang kakuwangan niini.
Giklaro ni Bañacia nga dili tinuod ang report nga nagtinguha ang siyudad sa Davao pag-ilog sa pag-host sa maong international nga kalihukan.
Kini tungod kay bugtong ang preparatory summit lang ang pagahimuon sa maong siyudad ingon man sa ubang mga dapit dinhi sa nasud pipila ka mga bulan sa dili pa ang pormal nga kalihukan.
Hinuon mga sakop sa board of directors ug mga foreign ministers lang sa lainlaing kanasuran ang gitakdang motambong ning maong preparatory summit nga gitumong aron paghan-ay sa mas daku pang kalihukan.
Subling nangayo og pasaylo si Mayor Tomas Osmeña sa konbenyinte ngadto sa mga Sugboanon ug sa mga magpapatigayon ilabi na sa pagdeklarar unya og tulo ka adlaw nga special holiday atol sa pagpahigayon sa maong summit. Apan si Mandaue Mayor Thadeo Ouano supak nga tas-on ang special holiday tungod kay matud niya makadaot kini sa mga negosyante.
Matud ni Osmeña kinahanglanon kaayo kini aron gyud masiguro ang siguridad sa dili mominos 17 ka mga pamuno nasud ang motambong ingon man ang mga sakop sa gabinete niining mokuyog aron pagtambong sa maong okasyon.
Subling mi-apelar si Osmeña ngadto sa mga magpapatigayon sama sa mga malls ug department stores nga mosira kini sa maong adlaw ingon man ang mga gasoline station aron mahapsay ang dagan sa trapiko sa dakbayan.
Kumbinsido si Osmeña nga magbunga unya kini og positibong resulta sa ekonomiya ug turismo sa dakbayan sa Sugbo kun magmalampuson ang pagpahigayon sa maong international nga kalihukan gumikan kay mapamatud-an na man unya nga malinawon og maayong lugar ang Sugbo ilabi na sa pamatigayon.