Wala mailhing lalaki nadasmagan

Nabuak ang ulo sa hubog nga tawo og anaa sa kritikal kahimtang sulod sa tambalanan ang usa ka lalaki nga hangtod karon wa pa mailhi human madasmagi og usa ka motorsiklo samtang nilabang sa dalan, pasado alas 5 kagahapon sa buntag didto sa National Hi-way Barangay Yati Lungsod sa Liloan.

Si PO3 Ricardo Enriquez sa Liloan Police Station miila sa drayber sa motorsiklo mao si Nilo Camay hingkod ang panuigon nga taga Barangay Tabla Liloan nagdala sa Honda MC, nga may plaka GL-5591.

Matud ni Enriquez nga gikahinabi sa Banat News, nga samtang nagmaniho si Camay sa iyang motorsiklo padulong sa dakbayan sa Sugbo, pag-abot sa nahisgutang lugar kalit lang milabang ang biktima nga gawandog-wandog sa kahubog, og wa usab makabantay si Camay hinungdan nga maayong pagkaigo ang biktima, hinungdan nga nalabay og napantok ang ulo niini sa simentadong dalan.

Nidugang si Enriquez nga wa gyud silay nakuha nga identification card kon ID sa biktima, matud niya nga walay tsinilas og medyo laguon.

Ang biktima gidali paghatod sa Don Vicente Sotto Memorial Medical Center, ug padayon pang giatiman sa mga doktor.