Proc. No. 1017 debatehan sa Kamara

Human mikalma og diyutay ang tensyon didto sa kauluhan gikatakda usab nga dunay mahitabong debate diha sa Ubos Balay Balauranan kabahin sa deklarasyon nga national estate of emergency niadtong Biyernes.

Matud pa ni Majority Leader Prospero Nograles sa report sa ABS-CBN nga ang proklamasyon 1017 ni Presidente Gloria Arroyo dunay basehanan, ug ang nahitabong initay diha sa Philippine Marine Corps sa Fort Bonifacio, mga hungihong nga dunay kudeta ug mga demonstrasyon diha sa kadalanan nakaapekto na gyud og dako sa seguridad sa nasud.

Apan si Cavite Representative Gilbert Remulla, sa iyang bahin mitug-an sa mga tigbalita nga ang mga demonstrasyon sa kadalanan usa lang ka pagpakita sa mga tawo nga wala na silay laing kadangpan aron ipadayag ang ilang mga wala pag-uyon sa mga panghitabo karon sa gobiyerno.

Dugang pa niya nga wala na kinahanglana ang susamang deklarasyon ilabi na kun ang hisgutan ang nahitabo sa militar nga giisip nga 'internal' nga problema lang ug mahimo rang mahilot sulod sa maong organisasyon.

Atol sa deklarasyon gidakop sa kapolisan sila si Anakpawis Rep. Crispin Beltran ug usa ka kanhi police chief, hinuon gipasalig ni Nograles nga hatagan og legal assistance si Beltran gikan sa mga magbabalaod.