'State of Emergency' – Arroyo

Gideklarar ni Presidente Gloria Macapagal Arroyo ang state of emergency pipila ka oras human ang mga dismayadong kasundaluhan sa iyang administrasyon milusad og suway nga kudeta kagahapon.

Gipahibawo ni Press Secretary Ignacio Bunye nga usa ka Proclamation No. 1017 ang gipirmahan ni Arroyo diin gipaubos ang tibouk nasud sa state of emergency.

Sa pamahayag ni Arroyo, iyang gibaharan nga dakpon ang mga opisyal sa militar ug mga sibilyan nga nalambigit sa maong pagsuway nga kudeta.

"Bilang comnander in chief, kontrolado ko ang sitwasyon," nagkanayun si Arroyo.

Nanawagan usab si Arroyo sa tanang opisyal sa mga lokal nga kagamhanan nga ipadayun ang trabaho aron dili mabutang sa peligro ang kahimtang sa katawhan.

Gisalig usab ni Arroyo ngadto sa mga labaw sa militar ug kapolisan ang tanang kalihukan.

"Ito naman ang babala ko sa mga nagbabalak laban sa bayan - babagsak sa inyong pagtataksil ang buong bigat ng batas," dugang bahad ni Arroyo.

Matud pa ni Arroyo nga gi-angin sa mga traydor nga opisyal ang mga kabus ug ang ekonomiya.

Nanawagan si Arroyo sa katawhan nga kalmado lang ingon man sa mga sakop sa media nga dili hatagan og pagtagad ang mga sayop nga impormasyon.

Apan sa iyang bahin si Senate President Franklin Drilon nagkanayun nga ang deklarasyon ni Arroyo wala kini maghatag kaniya og dugang gahum.

"Only through a declaration of martial law can she do that," matud pa ni Drilon.

Gibana-bana nga moabot sa napulo ka opisyal sa militar ug mga sibilyan ang buot untang moilog sa gahum kagahapon pinaagi sa kudeta.

Usa sa giila ni Presidential Chief of Staff Michael Defensor si Army Brigadier Gen. Danny Lim, kumander sa First Ranger Regiment nga nagbase sa Bulacan kinsa gihulipan dayun sa katungdanan sayo kagahapon.

Gibutyag ni AFP chief of staff Gen. Generoso Senga nga nanawag kaniya si Lim niadtong Huwebes sa gabii ug nihangyo nga pabiyaon siya sa Presidenti.

Matud pa ni Senga nga si Lim usa sa "misguided elements" nga nagplanong mo-martsa kauban sa mga oposisyon kagahapon aron pagpalagpot kang Arroyo sa katungdanan.

Personal nga gikustodiya ni Senga si Lim aron mapugngan ang iyang pag-apil sa plano nga kudeta.

Giparelibuhan usab ni PNP Director General Arturo Lomibao si Chief Supt. Marcelino Franco sa PNP Special Action Force.

Base sa nahipos nga impormasyon sa militar nga ang nagplano sa kudeta nagtigum na sa niaging tulo ka tuig aron palagputon si Arroyo sa gahum.