Jailguard positibo sa drugs

Usa sa mga gi-drug test nga mga sakop sa Bureau of Jail Management and Penology sa Bagong Buhay Rehabilitation Center ang migawas nga positibo sa paggamit sa drogas. Apan sumala pa ni Konsehal Agustus Pe ang tsirman sa Committee on Dangerous Drugs sa konseho nga dunay upat ka jailguards ang ilang gidudahang tiggamitan og iligal nga drogas hinungdan sa gihimong surpresang drug test sa tanang mga sakop niini sugod niadtong milabay'ng adlaw.

Si Pe mitug-an nga ang maong gwardiya nga mitumaw nga positibo ipailawom pa sa confirmatory test aron masiguro nga tiggamitan ba kini og gidiling drogas.

Sa pakighinabi kang Pe sa The Freeman/Banat News nga sa gihimong drug test sa 64 ka mga sakop sa Bureau of Jail Management and Penology sa BBRC usa lang ang mitumaw nga positibo sa paggamit sa drogas apan ang kadagkuan na sa BJMP-7 maoy pabut-on sa kapalaran sa maong gwardiya.

Mibahad si Nemeño nga taktakon gyud ang maong gwardiya gumikan sa pagpakahilom niini bisan og nasayod na kining dunay ipahigayon nga drug testing wala gyud kini moangkon daan aron unta mapailawom sa drug rehabilitation program.

Gihimo kini gumikan sa mga pagdudang dunay mga jailguards nga tiggamitan og drogas nga posibleng mao usab ang kakunsabo sa mga tigpayuhot og shabu diha sa maong bilanggoan.

Ang BBRC naputos og daghang mga pagsaway gikan sa mga opisyal sa dakbayan sa Sugbu gumikan sa mga kontrobersyang mitumaw sa maong bilanggoan nga gikalambigitan sa grabeng kahuot, mga riot, pag-eskapo, giingong special treatment sa mga inilang mga bilanggo, pagpalusot og mga drogas ug gibawal nga kagamitan.