Kaso ni Tining itugyan na lang sa iyang pamilya – mga higala

Gitugyan sa mga higala ni Bogo Mayor Celestino "Tining" Martinez III ngadto sa iyang pamilya ang paghimo og legal nga lakang sa paglambigit kaniya sa tulis sa Landbank sa ilang lungsod sa niaging tuig.

Kini human mipadayag sa ilang personal nga suporta ang mga higala ni Martinez kinsa mga opisyal sa Bogo-Medellin Sugarcane Planters Association nga gipanguluhan ni Jose Mari Miranda.

Hinuon matud pa ni Miranda nga posibli nga ang ilang grupo mopagawas og opisyal nga baruganan labot sa pasangil ngadto sa mayor.

Matud pa ni Miranda nga kaya sa banay'ng Martinez sa lungsod sa Bogo ang pagkuha og abogado nga mohimo og legal nga lakang sa maong kaso.

Si Martinez gipasanginlan sa usa sa mga suspek sa tulis sa LBP Bogo nga si Joel Sumabong nga maoy nagpaluyo kanila sa paghimo sa krimen.

Si Sumabong kinsa nisurender sa kapolisan mao karon ang giimbestigar sa Criminal Investigation and Detection Group 7 labot sa iyang paglambigit sa mayor sa kaso.

Wala pa'y giluwatan nga plano ang banay'ng Martinez gawas sa pamahayag sa amahan sa mayor, kanhi Kongresista Celestino "Junnie" Martinez, Jr., nga politika ang nagpaluyo sa pagduhig sa pangalan sa iyang anak sa kaso.

Gitumbok ni Junnie sila si Daanbantayan Mayor Maria Luisa Loot ug ang bana nga hepe sa Cebu Police Provincial Office, Sr. Supt. Vicente Loot, nga maoy nagpaluyo niini.

Kini ang hinungdan nga naglikay usab si Sr. Supt. Loot sa pagkupot sa kaso ug gitugyan na kini ngadto sa CIDG7.

Apan sila si Miranda ug kaubanan miklaro nga wala'y politika ang ilang paglaban kang Tining sanglit dili politikal ang ilang grupo ug igo lang sila nipadayag sa ilang pagsuporta sanglit wala sila'y nakitang dautang lihok sa batan-ong mayor.