Minor gikan nanglabni gipusil patay sa 'vigilante'

Usa ka 17 anyos nga gidudahang isnatser ang gipusil patay sa wala mailhing lalaki nga giingong misunod human ang biktima milabni sa ariyos sa usa ka babayeng namalit og utanon diha sa Unit 3 Carbon market sa barangay Ermita ning dakbayan niadtong Martes sa gabii.

Ang biktimang si Jerry (apelyedo gipugngan)17 anyos, molupyo sa naasoy'ng barangay nakaangkon og usa ka samad pinusilan diha sa likod nga milapos diha sa iyang lusong-lusong nga nakaingon sa iyang kamatayon.

Apan gawas sa biktima napagan usab ang usa ka ginang kinsa nangumpra nianang tungura nga si Vilma Lumapas, taga dakbayan sa Mandaue, si Lumapas naigo diha sa tuong bukton.

Sumala pa sa imbestigasyon sa Homicide Section ang biktima dunay usa pa ka kauban dihang gilabnihan ang usa ka wala mailhing ginang sa ariyos niini, human yanong milakaw ang suspek nga daw walay nahitabo.

Apan dihang misiyagit ang ginang, usa ka wala mailhing lalaking pasahero sa usa ka PUJ ang mikanaog og gisundan ang biktima, diha dayon usa ka buto sa armas ang nadunggan gikan sa gikahitaboan, dihang gisusi nagbuy-od na ang biktima.

Sukwahi sa ubang insidente sa pagpatay sa vigilante style killings kasagaran ang mga suspek duha ngadto sa upat ka tawo nga magsakay og mga motorsiklo ug magtaptap sa nawong, apan ang mipatay sa biktima nagluwan ra sa PUJ ug mi-react lang dihang dunay nangayo og tabang dayon mipusil sa suspek.