'Milugos', mipukpok og bato sa 9-anyos gikiha sa korte

Gipasakaan na og kasong frustrated murder ang suspek nga gidudahang milugos ug midukdok og bato sa ulo sa usa ka 9 anyos nga batang babaye nga nasalbar lang dihang nadunggan ang hilak ug agulo sa biktima nga nakapaalarma sa silingan sa suspek diha sa barangay Baliwagan, lungsod sa Balamban niadtong nakalabay'ng Lunes sa buntag.

Ang gipasakaan og kaso diha sa sala ni MTC Judge Jocelyn Regencia mao si Jessie Ursua, lumad nga taga Banga caves, Tagbae Ragay sa Camarines Sur ug kasamtangang nagpuyo sa maong barangay.

Sumala pa sa imbestigasyon sa kapolisan sa Balamban ang biktima pugsanong gibitad sa suspek padulong sa iyang balay samtang ang biktima padulong pauli gikan sa tindahan sanglit dunay gipapalit ang iyang inahan.

Dugang pa sa mga polis ang silingan sa suspek nga si Robert Dacanay maoy nakadungog sa agulo ug hilak sa biktima gikan sa balay sa suspek maong iya kining gisusi gumikan sa pagduda.

Diha niya nakit-an si Ursa nga nanarapo og tuwalya sa nagkadugong mga kamot ug dihang iyang gisusi nakita niya ang ulo sa biktima nga nagkadugo ug ang suspek sa kakurat igo lang mitabis og tan-aw kaniya.

Nianang tungura pugsanong gikuha ni Dacanay ang biktima gibitad kini pagawas sa balay sa suspek samtang ang suspek daling miikyas agi sa luyo sa balay ug mipaturatoy og dagan palayo.

Ang mga mirespondeng kapolisan, mga tanod ug anticrime volunteers misubay sa palibot sa lugar ug diha na makit-ing miluklok sa fishpond nga gipanag-iya sa banay'ng mga Del Castillo.

Nakuha diha sa crime scene ang usa ka batong dunay daghang lama sa dugo nga gituohang maoy gigamit sa suspek pagdukdok sa ulo niini, gituohang nagmagahi ang biktima sa buot buhaton sa suspek maong gibukbok kini.

Ang biktima daling gidala sa Balamban District Hospital ug gibalhin sa Vicente Sotto Memorial Medical Center alang sa pagpahiling kun nalugos ba kini sa suspek.