P20 mil ganti sa pagpasikop sa polis gidawat na

Gidawat na kagahapon sa buntag ang P20 mil nga ganti nga gitanyag sa kagamhanan sa dakbayan sa Sugbo ngadto sa sibilyan nga nakahatag og impormasyon sa National Bureau of Investigation (NBI-7) nga miresulta sa pagkasikop sa polis nga misuway unta sa pagpangilkil sa dinakpan niini.

Alas 11 pasado kagahapon sa buntag pormal nga gidawat ni Corazon Escobedo ang maong kantidad nga personal nga gitunol ni Mayor Tomas Osmeña ngadto kaniya isip pagpasidungog sa siyudad niadtong mga tawo nga mosumbong sa mga hiwing binuhatan sa mga sakop sa kapolisan.

Si Corazon mao kini gipangayoan og P40 mil nga suborno ni PO2 Jaime dela Cruz bugti sa pag-release sa bana niini nga nasikop gumikan sa paghupot og gidiling drugas ug pagsibog sa kasong posibling atubangon sa iyang bana.

Apan daling nakig-alayon si Escobedo sa NBI hinungdan nga nilampos ang entrapment operation sa usa sa mga kan-anan atbang sa Cebu City Police Office niadtong milabay'ng semana ug nasikop gyud sa akto ang pagpangilkil ni dela Cruz.

Human sa maong panghitabo gihatagan usab dayon ni Osmeña ang mga operatiba sa NBI og P50 mil nga ganti gumikan sa maong kalampusan.

Nunot niini gidasig ni Osmeña ang mga sibilyan pagsumbong niadtong mga kurakot nga polis aron kini masikop gumikan kay mao kini nakaguba sa imahen sa departamento sa kapolisan.

Nasayran usab nga nakahilak gyud si Escobedo dihang gipangutana sa mga tigbalita gumikan kay gibati siya og konsinsya sa iyang gibuhat nga pagpabilanggo sa maong polis.

Gawas niini, iya usab nga gitug-an nga mahadlok na sila mogawas sa ilang pinuy-anan gumikan kay dunay mga tawong kadudahan og linihukan ang nagsigi og paniid kanila.

Apan iyang giangkon nga wala siya magbasul sa iyang gibuhat pagsumbong sa NBI sa maong polis.