Kawit Park tukoron diha sa SRP

Gitun-an karon sa mga lokal nga opisyal sa dakbayan sa Sugbo ang pagpanindot sa mga lugar nga giilang tourist destination dinhi sa Sugbo aron makadani kini og dugang pang mga turista ingon man mga langyawng magpapatigayon pagbubo og puhonan atol unya sa gitakdang pag-host sa dakbayan sa 12th Asean Summit karung bulan sa Disyembre.

Gumikan niini gisugyot sa Parks and Playground Commission nga panindoton ang Kawit Island sa South Reclamation Project (SRP) atol unya sa pagpahigayon sa maong Asean Summit nga tambungan sa kinse ngadto sa 17 ka mga head of state sa lain laing kanasuran.

Gibana banang mogasto ang siyudad sa Sugbo og P695,093.00 alang sa himoong landscaping ug ang suholan sa mga tawong mo-trabaho aron pagpanindot sa tawgong "Kawit Park."

Si konsehal Arsenio Pacaña tsirman sa committee on commerce trade and industry maoy nangamahan sa resolusyon alang sa pagpangayo og gahin sa maong proyekto ngadto sa siyudad diin ang mao niyang resolusyon gitakda kining diskuti-on atol sa sesyon sa konseho karung Miyerkules.

Ang Cebu City Engineering Office ug ang SRP Project Management Office gipahibalo na kabahin ning maong plano.

Nasayran nga una nang gipahibalo ni mayor Tomas Osmeña nga interesado sab ang Big Foot Company nga magtukod og international yatch club sa maong dapit gawas sa plano niining tukoron nga international movie Studio.