Lecciones: Wala ko kaila sa mga tawo sa kasosyo ni Yapha

Wala makaila ang regional director sa Department of Agriculture 7, Eduardo Lecciones, sa mga tawo ni Kongresista Antonio Yapha nga giingong incorporators sa Kasosyo Foundation.

Matud pa ni Lecciones nga dili na trabaho sa ilang buhatan ang pagsusi sa background sa mga incoporators aron pag-accredit sa usa ka non-government organization.

Ang Kasosyo Foundation maoy gihatagan sa DA sa kontrobersiyal nga fertilizer fund nga mokantidad og P9-milyones samtang ang napagawas 60 porsyento lang sa tuig 2004.

Ang nailhan lang ni Lecciones mao si anhing Wilfredo Camomot, kanhi magsisibya ug giingong tigsulat sa diskurso ni Yapha. Apan nasuta nga ang ubang incorporators mga tawo ni Yapha.

Kini mao sila si Ofelio Puno, cashier sa Jegan's Bus Liner nga iya sa banay'ng Yapha, Abundio Elle nga mao ang tire maintenance, Nida Ordeniza, secretary ni Yapha ug Monico Baron, drayber ni Pinamungajan Mayor Jeffrey Yapha nga anak sa kongresista.

Lakip nga wala nasayud si Lecciones nga ang numero sa telepono nga gigamit sa NGO sa ilang rehistro sa Securities and Exchange Commission iya sa klinika ni Yapha sa Visayas Community Medical Center.

Gipasabot ni Yapha nga bugtong ang Kasosyo Foundation lang ang NGO nga accredited sa DA nga nagbase sa Sugbo hinungdan nga maoy ilang girekomendar ngadto nilang Kongresista Yapha sa ikatulong distrito ug Kongresista Antonio Cuenco sa Cebu City South District nga mogasto sa fertilizer fund alang sa mga mag-uuma pinaagi sa memorandum of agreement.

Laing nahatagan sa DA sa fertilizer fund mao ang lokal nga kagamhanan sa lungsod sa Argao ubos ni Mayor Wilfredo Caminero human maoy girekomendar ni Kongresista Simeon Kintanar.

Dugang pa ni Lecciones nga ang fertilizer fund ipagasto kini sa lokal nga kagamhanan o kaha sa usa ka NGO alang sa panguma ubos sa usa ka MOA ug dili kini moagi sa mga kongresista.