Kalabira napalgan sa Dalaguete

Usa ka kalabira sa tawo ang napalgan sa mga molupyo diha sa usa ka suok kaayong kakahuyan usa ka kilometro ug tunga ang gilay-on gikan sa National Highway sa barangay Obong sa lungsod sa Dalaguete niadtong milabay'ng adlaw.

Ang barangay kapitan sa maong barangay nga si Maria Sol Rondez inubanan sa mga barangay tanod ug kapolisan pinanguluhan ni SPO2 Francisco Leormas misubay sa gikakaplagan sa maong kalabira diha sa Sitio Bakay sa samang barangay.

Matud pa sa kapolisan duha ka mga residente nga nangahoy maoy nakakita sa maong kalabira nga nataptan na og mga bagon ug sagbot,walay nakitang ilhanan sa biktima.

Samtang gisusi pa karon kung si kinsa kini ug kanus-a kini namatay, gituohang gilabay ra kini diha sa maong lugar gumikan sa gilay-on niini sa kalsada ug kasuok sa gikahimutangan niini.