Balikatan 07 anhi sa Sugbo

Mosalida na ning tuiga ang mga Amerikanong sundawo dinhi sa lalawigan sa Cebu kon mahinayon ang "Balikatan" kon hiniusang ehersisyo-militar tali sa mga sundawong Pilipino ug Amerikano.

Matud pa ni Master Sgt. Eduardo Metra sa Civil Relations Group sa Armadong Puwersa sa Pilipinas nga nagbasi sa kampo sa Central Command dinhi sa Sugbo nga adto kini ipahigayon sa "mid-north" kon mga lugar sa amihanang bahin sa Sugbo.

Sumala sa mga plano, mahimong sa tungatunga ning tuiga ipahigayon ang Balikatan.

Pagasakpan kini sa 60 ka mga sundawo sa Amerika ug ingon usab niini kadaghan ang mga tropang Pilipino.

Ang maong mga sundawo magikan sa US airforce, marines ug navy ug tugbangan usab kini sa mga sundawo usab nga Pilipinhon.

Ang maong "joint military exercises" dili mopahigayon og mga "combat operations" kon kombate, kundili pulos mga proyekto sibiko ang ilang himoon.

Ang pagpanukod og mga "farm to market road," taytayan, mga edipisyo sa eskuylahan, pagpanambal ug uban pa maoy misyon nila.

Kasagaran sa mga sundawo ning maong mga grupo mga enhinyero, doktor, drayber, piloto ug uban pa.

Apan matud pa ni Metra nga dili pa nila kini gipahibawong opisyal sa lokal nga kagamhanan gikan sa gobernador ug mga mayor sa kalungsoran ug kapitan sa barangay, tungod kay wa pay seguro ang maong schedule.