Nameke sa hotel, gidakop

CEBU, Philippines — Duha ka babaye ang gidakop sa kapolisan sa lungsod sa sa Argao, Cebu human giingong nigamit og peke nga online payment screenshot para ipangbayad sa sa ilang P75,395 nga hotel bills niadtong Martes sa hapon, Septiyembre 1, 2026.

Ang mga suspetsado giila sa kapolisan nga sila si alias “Kat,” 29 anyos, residente sa Cupang, Antipolo City, ug alias “Lisa,” 30 anyos, taga-San Fernando, Cebu.

Sumala sa inisyal nga imbestigasyon, miabot ang duha sa hotel sa Barangay Suba, Poblacion niadtong Agosto 29, mga alas 3:31 sa hapon, ug mipuyo didto sulod sa tulo ka gabii.

Gitakda unta ang ilang pag-check out niadtong Septiyembre 1, apan sa dihang gi-compute sa hotel ang ilang bayranan, mikabat kini og P75,395.

Matud sa kapolisan, gipakita sa mga babaye ang screenshot sa usa ka online payment transaction aron ipakita nga nakabayad na sila.

Apan sa pag-check sa hotel management sa ilang account, wala’y nadawat nga kantidad gikan sa maong transaksiyon, hinungdan nga gipugngan sila ug giberipika, nasuta nga peke diay kini nga transaksyon.

Ang operations manager sa hotel nga giila sa kapolisan nga alias “Leo,” 34 anyos, maoy mipasaka sa reklamo batok sa duha.

Gihangyo sa management ang mga suspetsado nga bayran ang ilang nahibiling bill pinaagi sa cash o uban pang balido nga paagi sa pagbayad, apan wala kini matuman.

Tungod niini, nangayo og tabang ang hotel sa kapolisan ug miresponde ang mga personnel sa Argao Municipal Police Station  ug gisikop ang duha.

Nag-atubang ang duha og kasong swindling o estafa ubos sa Article 315 sa Revised Penal Code.

Samtang, gipahinumdoman sa mga awtoridad ang publiko nga ang paggamit og peke nga payment receipt o proof of payment aron makalikay sa pagbayad sa bayranan mahimong mosangpot sa kriminal nga kaso.

Giawhag usab ang mga negosyo ug establisemento nga kanunayng i-verify ang digital payment transactions sa dili pa kumpirmahon nga nakabayad na ang ilang mga kustomer. (BANAT NEWS)