'Killer' ni George misurender na

Suspek sa pagpatay sa tigbalitang si George Benaojan niadtong milabay'ng tuig mitahan ngadto sa Regional Investigation and Intelligence Division sa Police Regional Office 7 human sa pagtago sulod sa 42 ka adlaw nga pagtago gikan sa pagpatay.

Si Roberto "Jinky" Jagdon, hingkod ang panuigon molupyo sa Camella Homes, barangay Lawaan Uno dakbayan sa Talisay maoy gisuspetsahang mipusil patay kang Benaojan niadtong Disyembre 1, 2005.

Apan si Jagdon mibutyag nga dili tinuod nga Roberto ang iyang pangalan kundili Jinky Jagdon alyas Michael Jagdon. Sumala pa niya nianang gipatay si Benaojan didto ra siya sa Sitio Paradise, barangay Kinasang-an ning dakbayan.

Si Jagdon mitahan sa iyang kaugalingon kang Inspector Romeo Santander sa RIID kinsa mao usab ang naninguha sa negosasyon.

Matud pa ni Sr.Supt. Agusto Marquez ang hepe sa RIID sa pakighinabi sa Banat News nga positibong giila si Jagdon ni Llanos apan wala makatumbok ang taxi drayber nga giingong usa usab sa mga testigo atol sa pagpahigayon og "police line-up" sa milabay'ng gabii diin napulo ka tawo ang gipapilian kanila.

"Hadlok man kuno siyang patyon kay sa alegasyon pa niya gi-threat daw siya sa tinuod nga mga gunmen nga maoy mi-set up daw niya," sumala pang Marquez.

Si Andriano "Jammy" Llanos kinsa tupad ni Benaojan pagkahitabo positibong miila kang Jagdon bisan sa gihulagway niyang pagtangtang niini sa bungot.

Dako ang pagtuo ni Jagdon nga gi-"frame up'ang nahitabo kaniya sa managsuong gipasanginlan niyang mga drug pusher sa ilang lugar nga iyang gipasakaan niadtong 2002 og kasong "harassment."

Matud pa niya nga imposibleng kun siya pay mipusil sa tigbalita nganong magbilin man gyud siya og ID diha sa crime scene nga nakahibalo man siyang magtug-an kini sa pagkatawo niya.Nagduda siyang gibutang og tuyo sa gitumbok niyang managsuon ang iyang ID aron siya maoy matumbok nga suspek.

Gipanghimakak ni Jagdon nga usa siya ka "gun for hire" nga miikyas didto sa Butuan City human patya si Benaojan dihang nanggawas na sa media ang iyang pangalan ingon man hulagway.

Dugang sa iyang gipanghimakak nga duna siyay gipatay nga barangay tanod sa barangay Pahina Central ning dakbayan niadtong tuig 2000, ang kapolisan padayong mitanggong kaniya karon gumikan sa giingong warrant of arrest kabahin ning maong kaso.

Samtang gisusi na karon ni Chief Inspector Juanito Enguerra sa Provincial Investigation and Intelligence Branch sa Cebu Provincial Police Office sa pakighinabi sa Banat News nga migawas na ang warrant of arrest ni Jagdon sa pagpatay kang Benaojan kagahapon gikan sa sala ni RTC Branch 21, Judge Eric Menchavez.

Giangkon ni Enguerra nga naglisod sila pagkuha sa kooperasyon ni Jagdon maong wala gyud nila mapalig-on ang gidudahang motibo gawas lang nga positibo siyang giila ni Llanos.

Si Benaojan nakabsan sa kinabuhi diha na sa Chong Hua Hospital gumikan sa grabeng igo niini sa iyang liog, dughan ug baba.