Akrho magpabadlong sa Sinulog ipadakop - Buscaino

Mibahad ang regional president sa Alpha Kappa Rho fraternity nga siyay mangunay og padakop ug mopabalhog sa presinto sa mga miyembro sa ilang grupong magpabadlong atol sa selebrasyon sa Sinulog nunot niining kabalaka sa kapolisan nga posibleng maguba ang kasadya sa maong kalihukan kun moulbo ang kasamok sa fraternity.

Kini maoy bahad ni Richard Buscaino sa pakighinabi sa usa ka lokal nga sibyaanan kagahapon, matud pa niya nga gidid-an sa ilang liderato ang tanang mga miyembro sa paglikay sa ilimnong makahubog sa maong adlaw ug higpit nga pasundon sa mga guidelines sama sa pagpundo sa ilang tambayan.

Ang Akrho sama sa milabay'ng duha ka tuig mosalmot sa kalihukan sa Sinulog karon diin giapilan sa grupo ang float category ug puppeteer category diin duna silay unom ngadto sa napulo ka mga higanteng isalmot.

Si Supt. Mariano Natuel, hepe sa Service Security Group sa pakighinabi sa Banat News mibutyag nga kun silang mga polis ang pabut-on dili pasalmuton ang mga fraternity sa parada apan matud pa nga diskriminasyon usab kung did-an ang si bisan kinsa nga mosalmot.

Gibutyag hinuon ni Natuel nga butangan og mas daghang polis ang mga dapit diin mag-istambay ang Akrho ug Tau Gamma Phi aron kalikayan ang kasamok.

Matud pa ni Natuel walay problema ang isig ka grupo gawas lang sa personalay nga panagsungiay sa mga miyembro sa grupo nga nakaamong sa kinatibuk-ang organisasyon.

Ang seguridad sa Sinulog parade gibahin sa Cebu City Police Office ngadto sa walo ka sektor nga matag sektor butangan og tulo ka opisyal uban sa ilang mga polis ug emergency medical service.