Planong international airport sa Bohol tabangan ni Tom

Motabang si Mayor Tomas Osmeña dinhi sa siyudad sa Sugbo sa pagpangita og paagi aron matigayon ang gi-planohang pagtukod og usa ka international airport didto sa lalawigan sa Bohol.

Usa sa giplanohan sa mayor nga mo-lobby sa Kongreso alang sa katukoran sa giplanohang international airport sa nahisgutang lugar.

Kini tungod kay napanglantawan sa mayor nga usa ang Sugbo sa maka-benepisyo unya kun mahinayon ang pagtukod sa maong international airport.

Gitumbok ni Osmeña ang mga turista gikan sa mga nasud nga Japan, Korea, Taiwan, China ug Russia nga maoy napanglantawan nga midagsa og maayo dinhi sa Kabisay-an gumikan kay mahiligon man kini sa mga white sand .

Usa sa nakita sa mayor nga epekto dinhi sa Sugbo gawas sa paglambo sa turismo mao ang pagdasig unya sa mga tinun-an nga mokuha og kurso nga Hotel Restaurant Management (HRM) aron makapanarbaho sa dugang mga beach resort ug mga establisamento nga buksan sa umaabot.

Gihulagway sab ni Osmeña nga molig-on ang turismo sa Sugbo kon makita ang kompetisiyon sa Mactan International Airport dinhi sa Sugbo ngadto na unya sa pagatukoron nga airport sa Bohol.