PO3 Java gidungagan ganti ni Tom

Gipahibalo ni mayor Tomas Osmeña nga hatagan niya og dugang ganti nga salapi gikan sa panudlanan sa siyudad sa Sugbo si PO3 Jerome Java suspek sa pagpusil patay sa ex-convict nga si Alemar Luna didto sa barangay Buhisan sa wala pay Pasko.

Atol sa press conference kagahapon sa udto gibutyag sa mayor nga dugang P10 mil nga ganti ang iyang ihatag ni PO3 Java gumikan kay off duty man kini dihang nagresponde og alarma hinungdan nga iyang napusilan patay si Alemar ginamit ang shotgun.

Subling gipasabot ni Osmeña ang mao niyang baruganan nga gitumong aron pagdasig sa tanang mga polis dinhi sa dakbayan nga epektibong mopatuman sa ilang gimbuhaton.

Kini tungod kay nabalaka ang mayor nga mosamot ang suliran sa pagsumpo sa mga motumaw nga krimen dinhi sa siyudad kun magduha duha na unya og respondi og alarma ang mga polis ilabi na kun off duty kini.

Gipasabot sab ni Osmeña nga gibati og kahadlok nga mopauli sa ilang pinuy-anan si PO3 Java gumikan sa daghang mga bata ni Alemar ilabina dihang gi-disarmahan kini sa iyang armas sa Cebu City Police Office (CCPO).

Kini maoy hinungdan nga iyang gi-isyuhan og armas nga shotgun ang maong polis nga iya sa siyudad sa Sugbo niadtong Disyembre 30 ug dihadiha iya pa gyud dayong gihatag ang P20 mil nga ganti.