Tomas ngadto's mga kriminal: 'Pamutos na mo'

Gitambagan ni Mayor Tomas Osmeña ang mga nahabilin pang kriminal dinhi sa dakbayan sa Sugbo nga maghinay-hinay na og pamutos aron molalin ngadto sa laing lugar.

Reaksiyon kini ni Osmeña sa labing uwahing vigilante killings nga nahitabo niadtong miaging gabii diin tulo ka mga gidudahang nalambigit sa operasyon sa gidiling drugas ang gipangtumba.

Gibutyag ni Osmeña nga wala siyay ikatabang aron masumpo ang vigilante killings gawas lang sa pag-awhag sa mga nahabilin pang kriminal nga mentras sayo pa mohinay hinay nalang kini og biya dinhi sa siyudad.

Kini tungod kay matud sa mayor dili usab mahimo nga i-sakripisyo niya ang interes og seguridad sa mga Sugboanon pinaagi sa paghatag og proteksyon sa mga kriminal gumikan kay gikabalak-an niya nga mas mosamot pa unya ang mga motumaw nga krimen dinhi sa dakbayan.

Nagkanayon ang mayor nga kun mosanong ang mga nahabilin pang kriminal sa iyang tambag segurado siya nga syento porsiyento nga mapatunhay sa hingpit ang kahusay ug kalinaw dinhi sa dakbayan.

Sa laing bahin, padayong gidasig ni Mayor Tomas Osmeña ang kapulisan nga gukdon ug bungkagon ang mga kriminal nga nagpabiling naglihuk dinhi sa dakbayan sa Sugbo.

Gihimong sumbanan sa Mayor si PO3 Jerome Java nadestino sa Punta Princesa Police Station nga nakapusil patay sa ex-convict nga si Alemar Luna nga gitumbok nga maoy hawod hawod diha sa barangay Buhisan.

Gibutyag ni Osmeña nga gimbuhaton sa kapolisan ang pagpanalipod sa publiko gikan sa bisan unsang kadaot ug ingon man pagsumpo sa mga kriminal.

Nasayran nga gipahibalo na ni Osmeña ang paghatag og P20 mil nga ganti ngadto kang PO3 Java sa pagtumba niini sa ex-convict nga si Luna apan paaboton una sa mayor ang resulta sa imbestigasyon una i-release ang maong ganti.

Kini tungod kay buot unang klaruhon ni Osmeña kon wala bay nalapas sa rules of engagement si PO3 Java dihang gika-engkwentro niini ang biktimang ex-convict.

Gitubag sa mayor ang mga gibuhiang pagsaway gikan sa pipila ka sektor ning iyang paghatag og ganti kang PO3 Java ug pagsuporta og iyang giawhag ang mga misupak niini nga paningkamutan niining makumbinser ang mga kriminal nga magbag-o na sa ilang pagkatawo aron malikay sa bisan unsang kadaot.