Si Cebu City Market administrator Elpidio dela Victoria Jr. sa pakighinabi sa Banat News mibutyag nga 70 porsiyento sa mga isda gikan sa Pasil gisuplay sa commercial fishing vessels ug ang 30 gikan sa mga ginagmay nga panagatan.
Sa pagmonitor sa presyo sa isda nga gitumod diha sa Pasil nasayran nga ang paborito gumikan sa kabarato ang isdang toloy nga P20 ang matag kilo niadtong Nobiyembre 14 miabot na og P50 kagahapon, samtang ang Suno (Lapu-Lapu) nga tag P230 matag kilo sa samang petsa miambak ngadto sa P280 kagahapon.
Sa maong monitoring sukad sa Nobiyembre 14 hangtud kagahapon misaka ang presyo sa tanang matang sa isda gikan sa P5 ngadto na sa P60 ug gipaabot nga mas motaas pa gyud kini hangtud sa bulan sa Enero paglurang sa grabeng epekto sa amihan.
"Tungod ni sa panahon karon nga amihan, kining maong sitwasyon padayon ni hangtud sa Enero, mao ni panahon nga menus kaayo ang mga mananagat kay kusog ang hangin, dagkong balod ug bugnaw, ang mga komersyal nga panagatan adto motumod sa ilang isda sa Manila kay mahal man ang presyo didto," pagpasabot pa ni dela Victoria.
Matud pa ni dela Victoria nga ang maong mga presyo sa Pasil palang kini dili pa ang presyo diha sa mga merkado, sumala pa ni dela Victoria nga patungan pa kini og P10 ngadto sa P20 matag kilo sa mga labasera.
Dugang pagpasabot ni dela Victoria nga matag panahon sa kapaskuhan susama gyud niini ang sitwasyon dinhi sa Sugbu apan molurang lang kini inig sulod na unya sa Pebrero.
Nasayran gikan kang dela Victoria gumikan kay ang Pasil fishport ang center of commerce nagkinahanglan ang Sugbu og 100 ngadto sa 150 ka toneladang isda matag adlaw maong kung dunay pag-us-os sa suplay niini maapektahan gyud ang presyo gumikan sa kadako sa demand.
Hinuon giklaro niya nga bisan sa kakulang sa suplay dili gihapon makalusot ang mga isdang nakuha sa iligal nga paagi sanglit nagpadayon pa gihapon ang pagpaniid sa mga nagsuplay niini.
Miawhag ang administrador nga mo-divert una ngadto sa karne ang mga konsumidor gumikan kay ang karne wala man mag-umento sa ilang presyo.