Gipusil patay atubangan sa silingan

Gipusil patay ang usa ka tawo sa atubangan sa mga silingan niadtong miaging hapon diha sa Sitio Riles sa barangay Basak, siyudad sa Mandaue.

Ang biktima mao si Victor Abe, 27 anyos, ulitawo nga nagpuyo sa nahisgotang dapit, samtang padayon pang giila ang nakaikyas nga suspek.

Nakasaksi sa maong pagpamusil ang managkapuyo nga sila si Cleofe Omar, 30 anyos ug Ronnie Canamo, 24 anyos kinsa diha usab atol sa maong hitabo.

Si SPO3 Eduardo Pasaylo sa kapolisan sa Presinto 3 sa nahisgotang dakbayan miingon nga mga samad pinusilan sa ulo, tiyan ug dughan ang naangkon sa biktima, usa ka basiyo sa kalibre .45 ang nakit-an diha sa crime scene.

Dugang pa niya nga dali nga gidala sa Mandaue City District Hospital ang biktima apan gideklarar kini sa mga doktor nga patay na nga nahidangat kanila, gisubay pa karon ang motibo sa pagpamusil.