Tubero giluba 16 ka higayon sa managsuon

Patay ang usa ka tubero human giluba 16 ka higayon sa managsuong iyang gikabingkil kagahapon sa kaadlawon diha sa Sitio Agaay, barangay Tejero ning dakbayan.

Giila sa kapolisan ang biktima mao si Reynald Querubin,31, taga dalan M.J. Cuenco samtang gitumbok nga miluba kaniya mao sila si Julius delos Reyes kinsa usa ka mangihaway og baboy ug maguwang niini nga si Dindo pulos mga silingan sa biktima.

Sumala pa sa imbestigasyon sa Homicide Section sayo una ang pagpanunggab nag-atbangayg inom ang biktima ug si Dindo hangtud nga nangaluro sa ilimnong makahubog diin mitumaw ang mainitong panaglalis tali kanilang duruha nga misangpot sa sumbagay.

Si Dindo kinsa wala kabawos sa biktima mipauli sa ilang balay ug misumbong sa iyang manghod nga siya gikulata ni Querubin. Nahibaw-an nga si Julius dunay aligutgot sa biktima sanglit kaniadto pa gidudahan niyang nag-iring iring ang iyang kapuyo ngadto sa mikulata sa iyang maguwang wala mobalibad sa hangyo sa igsuon.

Diha sa gamayng agianan giatangan sa duha ang biktima ug walay kukaluoy nga gitabangag luba si Querubin diha sa duha sa liog, usa sa dughan, ug usa ka dakong samad sa tiyan nga nawiwi diin milugwa ang ginhawaan sa biktima ug ang uban diha sa likod.

Human sa insidente daling miikyas ang mga suspek apan naabtan sa mga polis si Julius diha sa North Reclamation Area sa mga sakop sa Mobile Patrol Group