Ang buhatan sa Liquor and Licensing Commission sa Cebu City Hall matag tuig gyud kining makadawat og reklamo kabahin niadtong mga establisamento nga gipadalhan og mga solicitation aron pangayo-an og mga regalo sa Pasko sama sa letchon, ilimnon ug salapi sa nagpaka-aron-ingnong mga kawani sa maong buhatan.
Ang bag-ong hepe sa maong buhatan Aldwin Limosneros miluwat og direktiba nga nagpahibalo ngadto sa publiko, ilabi na gyud sa mga establisamento nga dili magpa-ilad niadtong mga tawo nga manuroy og mag-solicit ginamit ang pangalan sa maong buhatan.
Giklaro ni Limosneros nga dili gyud mahitabo nga mag-solicit ang ilang buhatan bisan pa og duna silay party nga himuon karong Pasko.
Gitug-an ni Limosneros dihang nahinabi sa Banat News nga dili kalikayan nga mapugos og hatag ang nahisgutang mga establisamento gumikan kay mahadlok man kini nga lisud lisuron unya panahon sa renewal sa ilang liquor permit karong bulan sa Enero sunod tuig.
Gipasalig ni Limosneros nga ipaubos sa imbestigasyon kadtong mga sakop nilang masakpan nga mohimo sa maong binu-ang og irekomendar ngadto kang mayor Tomas Osmeña nga pahamtangan ug bug-at nga silot kun mapamatud-an gikan sa maong reklamo. - Darrel A. Carumba