Kasamtangang gipangita karon ang eskapong si Arnold Abellana, alyas Hapon, 39, molupyo sa dalan Spolarium barangay Duljo-Fatima ning dakbayan kinsa nasulod sa Bagong Buhay Rehabilitation Center niadtong Nobiyembre 6, 2004.
Si Inspector Josephus Jelianggao sa pakighinabi sa Banat News mitug-an nga dunay atubangong imbestigasyong administratiba si Senior Jail Officer One Panfilo Aligato kinsa maoy escort sa eskapo.
Sumala pa ni Jelianggao nga nakaposas pa si Abellana dihang sa wala pa mahibaw-ing rason nalipat niini ang iyang escort ug nakasakay og PUJ hangtud nga wala na igkita.
Daling gialarma ang taga Mobile Patrol Group ug mga sakop sa Bureau of Jail Management and Penology aron paggukod sa suspek diha sa ilang panimalay apan giingong wala kini didto.
"Dili pa nato masulti kung unsay posibleng rason nga naikyasan man si Aligato but for sure there will be an investigation to be conducted," asoy pang Jelianggao.
Dugang pa ni Jelianggao nga duna gyuy tolubagon si Aligato, sanglit giingong si Abellana ray gibantayan niini dihang nakaikyas ang priso.