Ang operasyon sa CIIB gihimo isip saturation drive diha sa Sitio Lubi, Barangay Luz ning dakbayan pinanguluhan ni Supt. Pablo Paul Labra human makadawat og reklamo gikan nila ni Barangay Luz Konsehal Renato Labrador ug barangay Hipodromo konsehal Ruben Paza kalabot sa nagkuyanap nga pagbaligya og drogas diha sa maong dapit.
Giila ang napatay mao si Dave Esbra alyas Divan, minyo, taga Sitio Sto. Niño 1 sa naasoy'ng barangay gitumbok nga level two drug pusher sa kapolisan nga nag-operate sa maong dapit.
Sumala pa sa imbestigasyon sa Homicide Section naaktuhan sa CIIB si Esbra nga naghupot og onse ka paketeng may sulod sa gituohang shabu hinungdan nga giaresto kini sa mga polis.
Apan giingong samtang giposasan kini kalit nga mikisi-kisi ang biktima ug daling midagan sa suok nga mga agianan sa maong lugar hinungdan sa nahitabong ginukdanay.
Si PO1 Roy Carlo Veloso ug civilian driver nga si Nike Pelaez giingong maoy naka-corner kang Esbra apan ang naulahi gikatahong mibunot og kalibre 45 pistola hinungdan nga nahitabo ang panaglayog.
Si Pelaez giingong daling miatras apan kalit nga mipaka ang usa ka buto sa armas ug diha-diha nalup-og si Veloso sa ubos, giingong sa kahadlok sa polis iya usab gipusil ang suspek aron pagdepensa sa iyang kaugalingon.
Sumala pa sa Homicide Section nga dunay 13 ka samad pinusilan ang biktima nga hinungdan sa hinanali niining kamatayon.
Nakuha diha sa crime scene ang usa ka kalibre 45 pistola nga may usa ka magazine ug duha ka buhing bala, lima ka basiyo sa kalibre 45 ug siyam ka basiyo sa kalibre 9 mm nga bala.