Dalagita biktima sa gang-rape

Usa ka 16 anyos nga dalagita mireklamong gitabanga'g lugos sa tulo ka kawani sa usa ka display center sa mga baligyaanan og sakyanan diha sa dalan J.P. Rizal barangay Tabok dakbayan sa Mandaue.

Si Chen (ngalan gipugngan) 16, molupyo sa maong barangay inubanan sa iyaan midangop sa Basak Police Station ug mipasangil batok nila ni Edgar Pacaldo, 24, minyo taga Buenavista, Bohol apan temporaryong nagpuyo sa Lower Hernan Cortes Village, Tabok dakbayan sa Mandaue.

Uban nila ni Adan Bonso, 22, taga Poblacion, lungsod sa Balilihan Bohol ug stay-in nga mekaniko sa maong establisamento ug Edwin Almuallas,29, minyo taga Sillon, Bantayan Island installer usab sa maong establisamento apan nagpuyo sa Sitio San Vicente Ferrer, barangay Tabok, dakbayan sa Mandaue.

Si SPO2 Juan Calamba sa pakighinabi sa Banat News mitug-an nga niadtong Nobiyembre 12 sa gabii mipalit ang biktima og cellphone load sa usa ka tindahan duol sa gitrabahuan sa mga suspek.

Apan pakyas ang dalagita kay walay load nga baligya sa maong tindahan nga nadungog usab ni Almuallas kinsa diha sa tindahan nagbarog-barog.

Giingong gihaylo ni Almuallas ang biktima ngadto sa ilang gitrabahuan kay dunay kauban niini nga nagnegosyo og load, inosente usab nga mikuyog ang biktima ngadto ni Almuallas.

Apan gikatahong pag-abot diha mismo sa guardhouse sa maong establisamento giingong kalit nga gibitad ang biktima pasulod sa compound ug daling gitrangkahan ang ganghaan.

Diha-diha giingong niduol usab sila si Bonso ug Pacaldo ug nitabang pagpugong sa pagkisi-kisi sa biktima samtang si Almuallas maoy mihubo sa mga sapot sa bata hangtud nga milampos ang mga suspek sa ilang dautang tuyo.

Si Romeo Taborasa, ang personnel manager sa maong tindahan sa pakighinabi sa Banat News nagkanayon nga mohimo silag kaugalingong imbestigasyon sa ilang mga sakop sanglit diha gyud kini mismo gihimo sa ilang compound.

Wala hinuon masikop ang mga suspek niadtong higayuna apan matud pa ni Calamba mianha pa sa ilang buhatan kagahapon ang mga suspek ug kusganong mihimakak sa pasangil aron malimpyo sa ilang pangalan.

Gipasusi na sa Basak police station ang biktima sa Vicente Sotto Memorial Medical Center ug gipasakaan na usab og kaso ang mga suspek.