Langaw, isdang tabagak suspek sa suka-kalibang

Tulo ka butang ang gipasanginlan sa paghugpa sa "kalibanga" sa Tabuelan nga mipatay og 3 ka tawo ug nakapahospital og laing 33, matud pa ni Noli Selle, usa ka empliyada sa gobiyerno sa maong lungsod.

Kini mao ang langaw, tubig ug isdang tabagak, matud pa ni Selle.

Mitug-an si Selle nga sa tibuok nilang kinabuhi karon pa sila makasinati og langaw nga grabe ka daghan sa palibot sa lungsod, sa patag ug sa kabukiran.

Ang ilang gipasanginlan niini mao ang mga manokan (poultry) ug usa sa daghan og poultry sa lungsod mao ang ilang bise mayor nga si Silvestre Momo.

Ang ikaduhang gipasanginlan nila mao ang tubig, tungod kay duha ang gigikanang suplay sa tubig sa mga molupyo sa lungsod.

Ang taga Poblacion gisuplayan sa tubig nga nagikan sa tinubdan sa barangay Kantakoyan, samtang ang taga bukid gisuplayan og tubig gikan sa tinubdan sa barangay Bagtik.

Ang ikatulong gidudahan nila nga hinungdan sa kalibanga mao ang pagdagsang sa isdang "tabagak" nga gumikan sa kadaghan, tag P5 nalang ang kilo.

Matud pa ni Selle nga may kalagmitang nasobrahan ra og kinaon ang mga biktima sa grabe kadaghang isda nga midagsang sa kadagatan sa lungsod niini lang buwana.