Si Loot nagkanayon nga iyang gilikayan ang posibilidad nga makaapekto sa nagpadayong imbestigasyon sa Provincial Intelligence and Investigation Branch batok nila ni SPO1 George Yap ug SPO4 Domenciano Sabellano lakip na ni PO3 Sherwin Abellare (wala maapil sa unang taho).
Sumala pa ni Loot sa Banat News nga misumiter na si Inspector Carlos Reyes og investigation report ug gibutyag sa maong report nga namahayag ang barangay tanod nga si Wenefredo Prangos nga wala niya makit-ing naghalog-halog si Yap sa usa ka babaye kun dili nag-istoryahay ra ang babaye ug si Yap gumikan kay nalambigit kini sa usa ka traffic accident.
Apan si Loot wala makumbinsir sa pangangkon ni Reyes kalabot sa pamahayag ni Reyes sa iyang investigation report gumikan kay wala didto ma-attach ang sworn affidavit ni Prangos, wala hinuon magduda si Loot sa maong pamahayag apan motuo lang siya kun makakita siya nga dunay affidavit ni Prangos nga gipasupot sa report ni Reyes.
Nagplano ang banay'ng Cañares nga mopasaka og pormal nga kasong administratiba ug kriminal ngadto sa tulo ka polis ug sa ilang hepe ngadto sa Ombudsman for the Military.
Sa laing bahin, ang hepe nga si Reyes imbestigahon usab sa PIIB kalabot sa giingong wala kini motuman sa kamanduan nga mag-alerto ang tanan gumikan kay red alert status niadtong higayona ang tibuok kapolisan sa nasud atol sa pag-abot sa kalag-kalag.