Si SPO3 Lino delos Santos ang deputy chief sa Tuburan police station mitug-an sa Banat News nga midangop kanila ang kapitan sa Sumon nga si Norma Burlas nga miingong dunay kadudahang tawo ang misunod kaniya samtang luwan siya sa Corominas Bus padulong unta sa dakbayan sa Toledo.
Gikatahong nakamatikod si Burlas nga kanunay'ng motan-aw kaniya ang maong tawo nga dunay gabagal sa hawakan nga gituohang armas, gani dihang gipalingkod kini sa konduktor nagdumili ang maong tawo ug miinsister nga diha lang kini mobarog sa may pultahan.
Si Burlas sa kahadlok, pag-abot sa may barangay Bato sa lungsod sa Asturias pasekretong nanaog agi sa luyong pultahan ug gibiyaan ang iyang kauban ug daling nagpahatud sa habal-habal pangadto sa Barangay Tubigag-Manok diin dunay detachment sa 78th Infantry Batallion.
Apan pakyas siya kay mibalhin naman og kampo ang mga sundalo sa pikas barangay maong didto siya mitago sa usa ka larasan og kahoy duol sa balay sa mayor sa Asturias ug mitawag ngadto sa ilang lungsod diin gikuha siya og mga polis.
Sumala pa ni Burlas sa usa ka interbyu sa lokal nga sibyaanan nga human mahibaw-i sa mga residente sa Sitio Lumboy ang hitabo daling namiya sa ilang mga pinuy-anan sa kahadlok nga duna na say pagpangatake sa ilang barangay.
Apan wala mokompirmar ang kapolisan sa giingong pagpamiya nasad sa mga tawo sa maong barangay.