OFWs tabangan sa ilang remittance

Gipangitaan karon og paagi sa mga opisyal sa siyudad sa Sugbo nga matabangan ang mga Overseas Filipino Workers (OFWs) nga maminusan ang ilang bayranan sa ilang pagpadala og salapi sa ilang pamilya dinhi sa nasud.

Kini human nasuta sa mga ospital sa dakbayan nga daku kaayo og mabayran ang mga OFW's sa ilang pagpadala og kuwarta sa ilang pamilya ilabina kon ipaagi kini og bangko.

Kini tungod kay halos doblihon man ang ilang magasto kun ipaagi nila sa bangko ang pagpadala og allotment sa ilang pamilya gumikan kay magbayad naman kinig charge sa ila palang nga pag-deposito sa bangko didto sa gawas ug lain na usab nga charges ang ipatuman sa bangko dinhi sa atong nasud kon moabot na ang maong kantidad nga gipadala.

Tungod niini nakahunahuna ug palabang og resolusyon si Konsehal Arsenio Pacana tsirman sa committee on trade and commerce and industry nga nag-awhag sa Bangko Sentral ng Pilipinas (BSP) pagpangita og paagi nga maminusan ang dakung gastohan sa mga OFWs sa ilang pagpadala og allotment sa ilang pamilya dinhi sa Pilipinas.

Kini tungod kay gumikan sa kadako sa magasto sa pagpadala ug kuwarta dinhi sa Pilipinas daghang mga OFWs ang maghuwat nalang nga dunay kauban nilang mapopos na ang kontrata ug mopauli na dinhi sa Pilipinas ang ilang padalhan sa maong allotment aron makadaginot kini gikan sa dakung gastohan.