Portugal mopanindot sa Magellan's Cross

Ang kagamhanan sa Portugal maoy mitanyag nga mogasto sa himuong pagpanindot sa Magellan's Cross sa may dalan Magallanes ning dakbayan.

Kini maoy katuyoan sa gihimong pagpakigtagbo sa ambassador sa Portugal ngadto sa mga kadagkuan sa Cebu City Tourism Commission ug Parks and Playground Commission nga gipangamahanan ni Konsehal Arsenio Pacana kagahapong adlawa.

Gibutyag ni Pacana dihang nahinabi sa Banat News nga mogahin og P100 mil alang sa himoong pagpintal sa Magellan's Cross pagpangandam sa tinuig nilang kalihukan nga National Portugal Day Celebration nga ipahigayon karong Hunyo 10, 2006.

Matud sa konsehal gipasabot sa maong ambassador ngadto kanila sa tigum niini kagahapon nga duna pay dakong kahigayonan nga mobisita dinhi sa siyudad sa Sugbo ang presidente sa Portugal atol sa maong kalihukan gumikan kay gitinguha sa maong nasud nga makahatag og historical impact sa kalihukan.

Kini agi usab og paghandum ni Magellan nga usa ka Portugese hinungdan nga nakig-alayon sila sa mga lokal nga opisyal dinhi sa dakbayan.