Vocational schools sa Cebu susihon - Pacaña

Giawhag sa pipila ka mga opisyal sa Committee on Education sa konseho sa dakbayan ang Technical Education Skills Development Authority (TESDA) nga mopahigayon og inbentaryo sa tanang mga kahimanan nga gigamit sa mga tunghaan ug unibersidad nga nagtanyag og mga vocational ug technical courses dinhi sa dakbayan.

Gibutyag ni Konsehal Arsenio Pacana, miyembro sa education committee nga tumong nila aron masusi ug masiguro kon luwas ba gikan sa peligro nga gamiton ang maong mga kahimanan aron malikayan nga dili na masubli ang nahitabong pagkamatay sa usa ka tinun-an sa Cebu State College of Science and Technology (CSCST) nga nakuryentihan ug namatay.

Si Raymond Pepito, 19 anyos, molupyo sa Pagsabungan siyudad sa Mandaue namatay Miyerkules sa buntag human nakuryintehan sa dihang iyang gisusi ang grinder nga mipalyar nga iyang gigamit sa workshop.

Nunot niini, mopanday og resolusyon ang konsehal nga iyang ipalabang sa konseho atol sa sesyon karung sunod semana alang sa maong katuyoan.

Isukip usab diha sa maong resulusyon sa konsehal ang pag-awhag sa kadagkuan sa Department of Manpower Development and Placement (DMDP) nga gipadagan sa siyudad sa paghimo usab sa susamang inventory aron pagsiguro nga dili depektuso ang mga kagamitan niini sa mga vocational ug technical courses aron paglikay sa kadaut.