6 polis sa Carbon nanghangyong ibalik allowance

Midangop sa buhatan ni Konsehal Augustus Pe Jr. sa Cebu City Hall ang unom ka mga polis nga nadistino sa Carbon Police Station nga giputlan sa ilang tagsa ka libo nga incentive allowance.

Kini aron magpatabang sa konsehal nga irekonsider ni Mayor Tomas Osmeña ang desisyon niini pagputol sa ilang incentive allowance sugod niadtong miaging bulan sa Setyembre.

Gipasabot sa maong mga polis sa ilang pagpakighinabi ngadto kang Pe nga igo lang silang nagresponde og alarma dihang nangayo og panabang si Assistant City Prosecutor Mary Ann Castro nga nagkabangi tali sa inpluwensiyadong magsuong Yu sa usa ka traffic incident diha sa Colon area.

Apan sa report nga nadawat ni Osmena nag-escort sa fiscal ang maong mga polis sa Carbon hinungdan nga gimandu niya ang pagputol sa insentibo niining gihatag sa dakbayan ug nanganti ang mayor nga dili niya ihatag og balik ang maong insentibo sa maong mga polis hangtud nga magpabilin nga madestino sa City Prosecutors Office si Fiscal Castro.

Gitambagan hinoon ni Pe ang maong mga polis nga ipaagi sa hand written ang mao nilang pagpasabot ug iduso kini ngadto sa buhatan sa mayor gumikan kay mao lang kini bugtong makadesisyon kun ihatag niini og balik ang giputol nga insentibo.